ശ്രീനരസിംഹകവചം

 ശ്രീനരസിംഹകവചം
(ബ്രഹ്മാണ്ഡ പുരാണം)



നൃസിംഹകവചം വക്ഷ്യേ 
പ്രഹ്ലാദേനോദിതം പുരാ ।
സർവ്വരക്ഷാകരം പുണ്യം 
സർവ്വോപദ്രവനാശനം ॥ 1॥

സർവ്വസമ്പത്കരം ചൈവ 
സ്വർഗമോക്ഷപ്രദായകം ।
ധ്യാത്വാ നൃസിംഹം ദേവേശം 
ഹേമസിംഹാസനസ്ഥിതം ॥ 2॥

വിവൃതാസ്യം ത്രിനയനം 
ശാരദിന്ദുസമപ്രഭം ।
ലക്ഷ്മ്യാലിങ്ഗിതവാമാങ്ഗം 
വിഭൂതിഭിരുപാശ്രിതം ॥ 3॥

ചതുർഭുജം കോമളാംഗം 
സ്വർണ്ണകുണ്ഡലശോഭിതം ।
ശ്രീയാസു ശോഭിതോരസ്കം 
രത്നകേയൂരമുദ്രിതം ॥ 4

തപ്തകാഞ്ചനസംകാശം 
പീതനിർമ്മലവാസസം ।
ഇന്ദ്രാദിസുരമൌലിസ്ഥ 
സ്ഫുരന്മാണിക്യദീപ്തിഭിഃ ॥ 5॥

വിരാജിതപദദ്വന്ദ്വം 
ശങ്ഖചക്രാദി ഹേതിഭിഃ ।
ഗരുത്മതാ ച വിനയാത് 
സ്തൂയമാനം മുദാന്വിതം ॥ 6॥

സ്വഹൃത്കമലസംവാസം 
കൃത്വാ തു കവചം പഠേത്
നൃസിംഹോ മേ ശിരഃ പാതു 
ലോകരക്ഷാർത്ഥ സംഭവഃ ॥ 7॥

സർവ്വഗോഽപി സ്തംഭവാസഃ 
ഫാലം മേ രക്ഷതു ധ്വനിം
നൃസിംഹോ മേ ദൃശൌ പാതു 
സോമസൂര്യാഗ്നിലോചനഃ ॥ 8॥

സ്മൃതിം മേ പാതുനൃഹരി 
മുനിവര്യസ്തുതിപ്രിയഃ ।
നാസം മേ സിംഹനാസസ്തു 
മുഖം ലക്ഷ്മീമുഖപ്രിയഃ ॥ 9॥

സർവ്വ വിദ്യാധിപഃ പാതു 
നൃസിംഹോ രസനാം മമ ।
വക്ത്രം പാത്വിന്ദുവദനം 
സദാ പ്രഹ്ലാദവന്ദിതഃ ॥ 10॥

നൃസിംഹഃ പാതു മേ കണ്ഠം 
സ്കന്ധൌ ഭൂഭരണാന്തകൃത് ।
ദിവ്യാസ്ത്രശോഭിതഭുജഃ 
നൃസിംഹഃ പാതു മേ ഭുജൌ ॥ 11॥

കരൌ മേ ദേവവരദോ 
നൃസിംഹഃ പാതു സർവ്വതഃ
ഹൃദയം യോഗിസാധ്യശ്ച 
നിവാസം പാതു മേ ഹരിഃ ॥ 12॥

മധ്യം പാതു ഹിരണ്യാക്ഷ
വക്ഷഃകുക്ഷിവിദാരണഃ ।
നാഭിം മേ പാതു നൃഹരിഃ
സ്വനാഭി ബ്രഹ്മസംസ്തുതഃ ॥ 13॥

ബ്രഹ്മാണ്ഡകോടയഃ കട്യാം
യസ്യാസൌ പാതു മേ കടിം ।
ഗുഹ്യം മേ പാതു ഗുഹ്യാനാം
മന്ത്രാണാം ഗുഹ്യരൂപദൃക് ॥ 14॥

ഊരൂ മനോഭവഃ പാതു
ജാനുനീ നരരൂപധൃക് ।
ജങ്ഘേ പാതു ധരാഭാര
ഹർത്താ യോഽസൌ നൃകേസരീ ॥ 15॥

സുരരാജ്യപ്രദഃ പാതു
പാദൌ മേ നൃഹരീശ്വരഃ ।
സഹസ്രശീർഷാ പുരുഷഃ
പാതു മേ സർവ്വശസ്തനും ॥ 16॥

മഹോഗ്രഃ പൂർവ്വത: പാതു
മഹാവീരാഗ്രജോഽഗ്നിതഃ ।
മഹാവിഷ്ണുർദക്ഷിണേ തു
 മഹാജ്വാലസ്തു നൈരൃതഃ ॥ 17॥

പശ്ചിമേ പാതു സർവ്വേശോ
ദിശി മേ സർവ്വതോമുഖഃ ।
നൃസിംഹഃ പാതു വായവ്യാം
സൌമ്യാം ഭൂഷണവിഗ്രഹഃ ॥ 18॥

ഈശാന്യാം പാതു ഭദ്രോ മേ
സർവ്വമംഗളദായകഃ
സംസാരഭയതഃ പാതു
മൃത്യോർമ്മൃത്യുർനൃകേസരീ ॥ 19॥

ഇദം നൃസിംഹകവചം
പ്രഹ്ലാദമുഖമണ്ഡിതം ।
ഭക്തിമാൻ യ പഠേന്നിത്യം സർവ്വ
പാപൈഃ പ്രമുച്യതേ ॥ 20॥

പുത്രവാൻ ധനവാൻ ലോകേ
ദീര്ഘായുരുപജായതേ ।
യം യം കാമയതേ കാമം
 തം തം പ്രാപ്നോത്യസംശയം ॥ 21॥

സർവ്വത്രജയമാപ്നോതി
സർവ്വത്ര വിജയീ ഭവേത് ।
ഭൂമ്യന്തരീക്ഷദിവ്യാനാം
ഗ്രഹാണാം വിനിവാരണം ॥ 22॥

വൃശ്ചികോരഗസംഭൂത
വിഷാപഹരണം പരം ।
ബ്രഹ്മരാക്ഷസയക്ഷാണാം
ദൂരോത്സാരണകാരണം ॥ 23॥

ഭൂർജേ വാ താലപാത്രേ വാ
കവചം ലിഖിതം ശുഭം
കരമൂലേ ധൃതം യേന
സിധ്യേയുഃ കർമസിദ്ധയഃ ॥ 24॥

ദേവാസുരമനുഷ്യേഷു
സ്വം സ്വമേവ ജയം ലഭേത്
ഏകസന്ധ്യം ത്രിസന്ധ്യം വാ
യഃ പഠേന്നിയതോ നരഃ ॥ 25॥

സർവ്വ മംഗള മാംഗല്യം
ഭുക്തിം മുക്തിം ച വിന്ദതി
ദ്വാത്രിംശതിസഹസ്രാണി 
പഠേത് ശുദ്ധാത്മനാം നൃണാം ॥ 26॥

കവചസ്യാസ്യ മന്ത്രസ്യ
മന്ത്രസിദ്ധിഃ പ്രജായതേ ।
അനേന മന്ത്രരാജേന 
കൃത്വാ ഭസ്മാഭിമന്ത്രണം ॥ 27॥

തിലകം വിന്യസേദ്യസ്തു
തസ്യ ഗ്രഹഭയം ഹരേത് ।
ത്രിവാരം ജപമാനസ്തു 
ദത്തം വാര്യഭിമന്ത്ര്യ ച ॥ 28॥


പ്രാശയേദ്യോ നരോ മന്ത്രം 
നൃസിംഹധ്യാനമാചരേത് ।
തസ്യ രോഗാഃ പ്രണശ്യന്തി
യേ ച സ്യുഃ കുക്ഷിസംഭവാഃ ॥ 29॥

കിമത്ര ബഹുനോക്തേന 
നൃസിംഹസദൃശോ ഭവേത്
മനസാ ചിന്തിതം യത്തു
സ തച്ചാപ്നോത്യസംശയം ॥ 30॥


ഗർജ്ജന്തം ഗർജ്ജയന്തം നിജഭുജപടലം സ്ഫോടയന്തം ഹഠന്തം
ദീപയന്തം താപയന്തം ദിവി ഭുവി ദിതിജം ക്ഷേപയന്തം ക്ഷിപന്തം ।

ക്രന്ദന്തം രോഷയന്തം ദിശി ദിശി സതതം സംഹരന്തം ഭരന്തം
വീക്ഷന്തം ഘൂര്ണയന്തം കരനികരശ തൈർദിവ്യസിംഹം നമാമി ॥ 31॥


॥ ഇതി ശ്രീ ശ്രീബ്രഹ്മാണ്ഡപുരാണേ പ്രഹ്ലാദോക്തം ശ്രീനൃസിംഹകവചം സമ്പൂർണം ॥